O EMHU ampliará a súa programación no 2024 para ofrecer 11 xornadas continuadas de shows nos que participarán as figuras máis relevantes da escena galega e estatal
O Encontro Mundial de Humorismo celebrará a súa cuarta edición do 25 de abril ao 5 de maio na Coruña. O Concello da Coruña volve a apostar polo EMHU, a cita humorística máis relevante de España, que reunirá en 2024, durante 11 xornadas, as figuras máis relevantes da comedia galega e estatal.
Serán case unha ducia de días nas que o humor, a improvisación e o impredicible derrubarán, coma se dunha máquina de demolición se tratara, a realidade en prol do sorriso, o deleite e a imaxinación. O EMHU regresará aos escenarios coruñeses na primavera de 2024 potenciando a súa proposta programática. O evento ampliará a súa duración, que pasará a ofrecer un total de 11 xornadas continuadas de humor, repletas dos shows máis seguidos do momento, producións propias e espectáculos únicos, que contarán cos principais nomes da comedia galega e nacional.
Entre as sesións exclusivas que se poderán ver na Coruña, están galas como Fantastic Colofon ou Humoris Causa, citas nas que o EMHU reúne un elenco de grandes figuras que se atopan por primeira vez nun mesmo escenario e nas que o público esgota rapidamente todos os billetes. O humor regresará á cidade da Coruña como unha máquina de demolición, protagonista do cartel desta cuarta edición, creado polo deseñador gráfico e ilustrador Riki Blanco, que coroa unha bóla de derriba flotante que esboza un sorriso.
O Encontro Mundial de Humorismo é a cita coa comedia máis relevante e multitudinaria de España. Figuras como Andreu Buenafuente, Sílvia Abril, Leo Harlem, Eva Hache, Javier Cansado, Carolina Iglesias, Ignatius Farray, Ana Morgade, Dani Rovira, Juan Dávila, Eva Soriano, Javier del Pino, Javier Veiga, Oswaldo Digón ou Xosé A. Touriñán, entre outras moitas, formaron parte do cartel nas súas tres primeiras edicións, nas que o público puido gozar de espectáculos como Estirando el chicle, Buenismo Show, Saldremos mejores, La ruina ou La vida moderna.
O Goberno de Inés Rey reforza deste xeito a súa aposta pola cultura e a celebración na cidade de grandes eventos de diferentes temáticas. A programación de espectáculos do EMHU completarase con diferentes actividades paralelas, dirixidas a todos os públicos, que se desenvolverán en distintos recintos culturais da Coruña.
